تاهوا من هجروا ماضيهم
الواد حناوي لما شاف المنظر ده إللي من
حلاوته العين ( تبربش ) ٠٠ قال في نفسه : يا صلاة النبي ، يا صلاة النبي و
الله لازم أشم النسيم في الغيط و في الحتة داهي بالذات ٠٠ دي حتة ولا كأنها
حتة م الجنة ٠٠ المية و الهوا و الخضرة و النخل و الزرع ٠٠ و فعلا يا
أسيادنا : الواد ركب العربية ( الكارو ) و خاد البت ستيتة ميراته و العيال
وراه و معاهم البصل و الخص و البيض و الرنجة و الفسيخ ٠٠ الواد نزل و أم
فارش ( الإياس ) و أعد هوا و جماعته على دماغ الأرض ٠٠ الواد يدوبك لسا
( بيفرد ) الحاجة عشان ياكل هوا و العيال إلا و يلمح بطرف عينه مين يا
أسيادنيييه ؟!! إيوة ، تسلموا من كل شر ، هوا الواد مرجاوي بغباوته و (
غتتاته ) و معاه البت شلبية ميراته و العيال ٠٠ الواد أول ما شافهم قال :
يادي المصيبة السودا !! حتى في يوم شم النسيم إللي جاي ( أتهوى ) فيه شوية
أني و العيال الواد ده جاي ورايا برضه !! و الأكادة إيه يا عشاء المكمل ،
الواد مرجاوي و جماعته جايين إيد ورا و إيد أدام ، ممعهومش صنف حاجة خالص
ولا حتى لمونة خضرة ٠٠ حناوي بصله و الشر بان في عنيه و قاله من تحت ( درسه
) : يادي الصباح النادي ٠٠ أومال الأكل إللي معاك فين عشان نعملها (
غديوة ) سوا ياد يا مرجاوي ؟!! ٠٠ مرجاوي بعينه إللي تندب فيها رصاصة قاله :
أكل !!! أكل إيه يابو أكل !! و الأكل إللي إنتوا جايبينه ده ( هنودينه )
فين ؟!! ٠٠ حناوي إستعجب م ( التلامة ) و حلف مهوا ( دايق ) الأكل هوا و
عياله طول النهار عشان الواد مرجاوي مياكلش معاه لا هوا ولا جماعته ٠٠
الواد مرجاوي عنده ( برود ) يتوزع على مديرية ٠٠ بصله و رد بالراااااحة و
قاله : إحلف على نفسك إنت و عيالك يا حيلي ٠٠ إحنا هناكل هناكل ، إن شالله
تودينا ( النؤطة ) ٠٠ الواد نادى على شلبية ميراته و قالها : يللا أقعدي
إنتي و العيال عشان ناكل يا بت ٠٠ شلبية قالتله : أؤمرني أمر يا سيد
الرجالة ٠٠ و يدوبك البت لسا جاية تقعد أمت البت ستيتة شاداها من شعرها و (
مرمغتها ) في التراب و قالتلها : سيد الرجالة إيه يا ( كارتة ) يا بنت
الكلب !! ٠٠ هوا مش المفروض برضه إن سيد الرجالة ده ( يكفي ) بيته و عياله
بدل ما يرمي جتته ع الناس و ( يتلأح ) على كل واحد شوية ؟!!!
( أديب الغلابة )
ليست هناك تعليقات:
إرسال تعليق